នៅឆ្នាំ២០១០ ភាពស៊ាំនឹងឱសថប្រឆាំងមេរោគ បានធ្វើឱ្យប្រជាជនថៃស្លាប់ប្រមាណជា ១៩ ០០០នាក់បន្ថែម ។[១] នៅប្រទេសថៃ ឱសថអង់ទីប៊ីយោទិកអាចរកទិញបានដោយគ្មានវេជ្ជបញ្ជា  ទើបឃើញមានការប្រើប្រាស់មិនត្រឹមត្រូវ ក្នុងចំណោមបុគ្គលិកសុខាភិបាល និងសាធារណជនទូទៅ។ [២] គេបានប៉ាន់ប្រមាណថាតិចជាង ១០ភាគរយនៃជំងឺផ្ដាសាយធម្មតាមានការភាន់ច្រឡំថា វាបង្ករោគដោយបាក់តេរី ប៉ុន្ដែនៅប្រទេសថៃ ឱសថអង់ទីប៊ីយោទិកត្រូវបានចេញវេជ្ជបញ្ជាជាទូទៅសម្រាប់ព្យាបាលផ្ដាសាយធម្មតានេះដោយបុគ្គលិកសុខាភិបាលនៅមន្ទីរពេទ្យ វេជ្ជបណ្ឌិតនៅតាមគ្លីនិក និងឱសថករនៅឱសថស្ថានជាដើម ហើយពេលខ្លះត្រូវបានស្នើសុំដោយផ្ទាល់ពីអ្នកជំងឺ។ ការប្រើប្រាស់   ឱសថ អង់ទីប៊ីយោទិកមិនត្រឹមត្រូវអាចផ្ដល់គ្រោះថ្នាក់ដល់សុខភាពអ្នកជំងឺ និងមនុស្សគ្រប់គ្នាក្នុងប្រទេស។

 កម្មវិធី “ការប្រើប្រាស់ឱសថអង់ទីប៊ីយោទិកដ៏ឆ្លាតវៃ”  ត្រូវបានប្រទេសថៃលើកឡើងជាកម្មវិធីគំរូមួយក្នុងការលើកកម្ពស់ការប្រើប្រាស់ឱសថដែលសមស្រប ដោយចាប់ផ្ដើមពីឱសថអង់ទីប៊ីយោទិក។ [២] គោលដៅ ៣សំខាន់ៗដែលបានកំណត់ក្នុងកម្មវិធីនេះ មានដូចជា៖ (១)ជំងឺផ្ដាសាយធម្មតាជាមួយនឹងការឈឺបំពង់ក (២)ជំងឺរាកស្រួច ស្រាវ (៣)របួសស្រាលដែលភាគច្រើនយើងមិនបាច់ត្រូវការឱសថអង់ទីប៊ីយោទិក។ កម្មវិធីនេះ មានចំនួន៣ដំណាក់កាល ៖ ដំណាក់កាលទី១ គឺប៉ាន់ប្រមាណលើបទអន្ដរាគមន៍ដែលមានគោលបំណងផ្លាស់ប្ដូរឥរិយាបថ នៃការចេញវេជ្ជបញ្ជារបស់វេជ្ជបណ្ឌិត ដំណាក់កាលទី២៖ ពិនិត្យមើលភាពងាយស្រួល ក្នុងការដំណើរការកម្មវិធី និងដំណាក់កាលទី៣៖ ផ្ដោតលើការលើកកម្ពស់ប្រកបដោយនិរន្ដរភាព។ [៣]

យើងឃើញមានយុទ្ធនាការជាច្រើននៅតាមបណ្ដាប្រទេសនានាក្នុងពិភពលោក ដែលបានបង្ហាញពីការលើកកម្ពស់ចំណេះដឹង និងដោះស្រាយបញ្ហាភាពស៊ាំនឹងឱសថអង់ទីប៊ីយោទិក ដូចជា Antibiotic Guardian និង សប្ដាហ៍យល់ដឹងអំពីឱសថអង់ទីប៊ីយោទិកសកល  ជាដើម។

រូបភាពទី១៖ ស្លាកសញ្ញា នៃការប្រើប្រាស់ឱសថអង់ទីប៊ីយោទិកដ៏ឆ្លាតវៃ

ពាក្យទាក់ទង៖ ចំណេះដឹងអំពីឱសថអង់ទីប៊ីយោទិក ការជ្រើសរើសឱសថអង់ទីប៊ីយោទិកបានត្រឹមត្រូវ ការប្រើប្រាស់ឱសថដែលសមស្រប ជំងឺផ្ដាសាយធម្មតា ជំងឺរាក

សេចក្ដីយោង

១ Sumpradit N., Chongtrakul P., Anuwong K., et al (2012). “Antibiotic Smart Use: a workable model for promoting the rational use of medicine in Thailand”. Bulletin of the World Health Organization. 90 (12): 905-913. doi: 10.2471/BLT.12.105445

២ Lim C., Takahashi E., Hongs wan M., et al (2016). “Epidemiology and burden of multidrug-resistant bacterial infection in a developing country”. eLife. 5 (e18082). doi: 10.7554/eLife.18082

៣ “Antibiotics Smart Use in Thailand”. reactgroup.org.