យោងតាមអង្គការសុខភាពពិភពលោក ឱសថប្រមាណជា៥០ភាគរយ បានផ្ដល់ឱ្យតាមវេជ្ជបញ្ជា ចែកចាយ និងលក់មិនត្រឹមត្រូវដោយរួមបញ្ចូលទាំងអ្នកជំងឺដែលលេបឱសថមិនត្រឹមត្រូវផងដែរ។[១] លើសពីនេះទៅទៀត មួយភាគបីនៃប្រជាជនសរុប មិនទទួលបាននូវឱសថជាមូលដ្ឋាន។ យោងទៅតាមគោលការណ៍ណែនាំរបស់អង្គការសុខភាពពិភពលោក ការប្រើប្រាស់ឱសថមិនសមស្របដែលកើតមានញឹកញាប់មានដូចខាងក្រោម៖

- អ្នកជំងឺប្រើឱសថច្រើនមុខ

- ការប្រើឱសថប្រឆាំងមេរោគមិនបានត្រឹមត្រូវ ដែលមិនមែនបង្ករោគដោយបាក់តេរី និងកម្រិតប្រើមិនត្រឹមត្រូវ

- ការប្រើលើសកម្រិតនៃឱសថចាក់ នៅពេលដែលឱសថលេបសមស្របជាង

- ការប្រើឱសថដោយខ្លួនឯងមិនសមស្រប

- វេជ្ជបណ្ឌិតមិនបានចេញវេជ្ជបញ្ជាសមស្របទៅតាមតាមគោលការណ៍ណែនាំក្នុងការព្យាបាល

ការប្រើប្រាស់ឱសថមិនសមស្របអាចនាំឱ្យជួបបញ្ហាធ្ងន់ធ្ងររហូតដល់ស្លាប់ ជាពិសេសចំពោះការបង្ករោគលើកូនក្មេង និងអ្នកជំងឺរ៉ាំរ៉ៃ។ ជំងឺរ៉ាំរ៉ៃមួយចំនួនទៀតដែលប៉ះពាល់ដោយសារការប្រើប្រាស់ឱសថមិនបានត្រឹមត្រូវមានដូចជា ជំងឺលើសសំពាធឈាម  ជំងឺទឹកនោមផ្អែម ជំងឺឆ្កួតជ្រូក និងជំងឺផ្លូវចិត្តជាដើម។ ការប្រើប្រាស់ឱសថមិនបានសមស្រប និងប្រើលើសកម្រិត គឺជាការខ្ជះខ្ជាយធនធាន ជាញឹកញាប់ធ្វើឱ្យអ្នកជំងឺចំណាយច្រើន ហើយបណ្តាលឱ្យមានផលប៉ះពាល់យ៉ាងខ្លាំងដល់អ្នកជំងឺ ក្នុងលក្ខខណ្ឌដែលលទ្ធផលអ្នកជំងឺមិនសូវល្អ និងផលអាក្រក់នៃប្រតិកម្មឱសថ។

ការប្រើប្រាស់ឱសថមិនសមស្រប ឬការប្រើឱសថប្រឆាំងមេរោគលើសកម្រិត កំពុងតែបណ្តាលឱ្យមានការកើនទ្បើងនៃភាពស៊ាំនឹងឱសថប្រឆាំងមេរោគ។ ការប្រើប្រាស់ឱសថអង់ទីប៊ីយោទិកមិនបានត្រឹមត្រូវ អាចជំរុញដល់តម្រូវការដែលមិនត្រឹមត្រូវ ហើយនាំឱ្យមានការកាត់បន្ថយការទៅរកកន្លែងថែទាំសុខភាពដែលមានអាជ្ញាប័ណ្ណ និងបាត់បង់ទំនុកចិត្តពីអ្នកជំងឺនៅក្នុងប្រព័ន្ធសុខាភិបាល។ បន្ទាប់មក នេះអាចនាំឱ្យមានវដ្តនៃការទិញឱសថអង់ទីប៊ីយោទិកដោយគ្មានវេជ្ជបញ្ជា និងទាមទារឱ្យមានឱសថអង់ទីប៊ីយោទិក ដែល "ខ្លាំង" "ខ្លាំងជាង" ឬ "ខ្លាំងបំផុត" ពីឱសថស្ថាន ឬកន្លែងថែទាំសុខភាព។

ដើម្បីបញ្ឈប់ការប្រើឱសថមិនបានសមស្រប គោលនយោបាយស្នូលទាំងអស់ត្រូវតែអនុវត្ត ដើម្បីលើកកម្ពស់ការប្រើឱសថឱ្យបានសមស្រប។ នេះរួមបញ្ចូលទាំងអស់ តែមិនកំណត់ចំពោះស្ថាប័នជាតិដែលសម្របសម្រួលគោលការណ៍នៃការប្រើប្រាស់ឱសថ គោលការណ៍វេជ្ជសាស្ត្រ ព័ត៌មានឯករាជ្យអំពីឱសថ និងការអប់រំសាធារណជនអំពីឱសថ។

ពាក្យទាក់ទង៖ ចំណេះដឹងអំពីឱសថអង់ទីប៊ីយោទិក ការជ្រើសរើសឱសថអង់ទីប៊ីយោទិកបានត្រឹមត្រូវ

សេចក្ដីយោង

1 WHO. (2002, September). Promoting Rational Use of Medicines: Core Components - WHO Policy Perspectives on Medicines, No. 005. Retrieved from https://apps.who.int/medicinedocs/pdf/h3011e/h3011e.pdf