ເຊື້ອຈຸລິນຊີເປັນໜຶ່ງໃນສິ່ງທີ່ມີຊີວິດທຳອິດທີ່ເກີດຂຶ້ນໃນໂລກ ເປັນສີ່ງທີ່ມີຊີວິດດັ້ງເດີມ ທີ່ອາໃສຢູ່ໃນດິນ, ພືດ, ນ້ຳ, ຢູ່ເທິງໜ້າ ພຽງສິ່ງຂອງທົ່ວໄປ ແລະ ໃນນ້ຳ. ທ່ານຍັງສາມາດໄດ້ຮັບເຊື້ອຈຸລິນຊີໂດຍການຈັບມື ຫຼື ການສຳພັດກັບລູກບິດປະຕູ.

ແຕ່ແນວໃດກໍ່ດີ, ຍັງມີເຊື້ອຈຸລິນຊີຫຼາຍຊະນິດທີ່ດີ ແລະ ມີປະໂຫຍດ. ເຊື້ອຈຸລິນຊີສາມາດຍ່ອຍສະຫຼາຍຊາກສັດ ແລະ ຊາກພືດທີ່ຕາຍແລ້ວ. ນອກຈາກນີ້ໃນໂຮງງານອຸດສາຫະກໍາ ເຊື້ອຈຸລິນຊີກໍມີຄວາມສຳຄັນໃນການບໍາບັດນໍ້າເປື້ອນ ແລະ ຍ່ອຍສະຫຼາຍຄາບນ້ຳມັນທີ່ຮົ່ວໄຫຼ. ເຊື້ອຈຸລິນຊີ ບາງຊະນິດອາໄສຢູ່ໃນລະບົບທາງເດີນອາຫານຂອງຄົນເຮົາ ແລະ ຊ່ວຍຍ່ອຍອາຫານ, ຊ່ວຍທໍາລາຍເຊື້ອພະຍາດອື່ນທີ່ກໍ່ໃຫ້ເກີດພະຍາດ ແລະ ສາມາດໃຫ້ສານອາຫານບາງຢ່າງແກ່ຄົນເຮົາ.

ເຖິງຢ່າງໃດກໍ່ຕາມ, ເຊື້ອຈຸລິນຊີຫຼາຍຊະນິດກໍ່ສາມາດເປັນອັນຕະລາຍແກ່ມະນຸດໄດ້, ໂດຍກໍ່ໃຫ້ເກີດພະຍາດຕ່າງໆເຊັ່ນ: ອັກເສບປອດ (ເຊື້ອ Streptococcus pneumonia), ເຍື່ອຫຸ້ມສະໝອງອັກເສບ (ເຊື້ອ Haemophilus influenza), ອັກເສບຄໍ (ເຊື້ອ Group A Streptococcus) ແລະ ອາຫານເປັນພິດ (ເຊື້ອ Escherichia coli  ແລະ Salmonella). ເຊື້ອຈຸລິນຊີທີ່ບໍ່ດີເຫຼົ່ານີ້ ເປັນສາເຫດທີ່ເຮົາຄວນຈະລ້າງມືໃຫ້ສະອາດ ແລະ ອະນາໄມຫ້ອງຄົວ ແລະ ຫ້ອງນ້ຳໃຫ້ສະອາດດີເປັນປະຈຳ.

ໂດຍທົ່ວໄປແລ້ວ, ເຊື້ອຈຸລິນຊີຈະອາໄສຢູ່ໃນສິ່ງແວດລ້ອມທີ່ຊັບຊ້ອນ. ເຊື້ອຈຸລິນຊີ ແລະ ເຊື້ອເຫັດ ບາງຊະນິດສາມາດ ຜະລິດສານຕ້ານເຊື້ອຈຸລິນຊີເພື່ອຂ້າ ຫຼື ຢັບຢັ້ງການຈະເລີນເຕີບໂຕຂອງຈຸລິນຊີຊະນິດອື່ນໆທີ່ເປັນຄູ່ແຂ່ງ ແລະ ອາໄສຢູ່ໃນບໍລິເວນດຽວກັນ. ບາງເຊື້ອຈຸລິນຊີສາມາດປັບໂຕໂດຍທຳມະຊາດ ເພື່ອຕ້ານຕໍ່ຢາຕ້ານເຊື້ອຈຸລິນຊີເຫຼົ່ານັ້ນເພື່ອໃຫ້ໂຕເອງສາມາດຢູ່ລອດໄດ້.

ເຖິງຢ່າງໃດກໍ່ຕາມ, ເມື່ອຄົນເຮົາໃຊ້ຢາຕ້ານເຊື້ອຢ່າງບໍ່ຖືກຕ້ອງ ແລະ ໃຊ້ຫຼາຍເກີນຄວາມຈຳເປັນ, ການປັບໂຕຂອງເຊື້ອຈຸລິນຊີ ຈະເກີດໄວຂຶ້ນ, ເຊື້ອຈຸລິນຊີທີ່ຕ້ານຕໍ່ຢາຕ້ານເຊື້ອຈຶ່ງພົບໄດ້ຫຼາຍຂຶ້ນເລື້ອຍໆ ແລະ ເຮັດໃຫ້ການປິ່ນປົວການຕິດເຊື້ອຈາກເຊື້ອ ຈຸລິນຊີ ເຫຼົ່ານີ້ຈະກາຍເປັນເລື່ອງທີ່ຫຍຸ້ງຍາກຍິ່ງຂຶ້ນ. ພວກເຮົາຕ້ອງຫຼຸດຄວາມສ່ຽງໃນການກໍ່ໃຫ້ເກີດເຊື້ອຕ້ານຕໍ່ຢາຕ້ານເຊື້ອ ຈຸລິນຊີ ໂດຍການຫຼຸດຜ່ອນການນຳໃຊ້ຢາຕ້ານເຊື້ອຈຸລິນຊີທີ່ບໍ່ຖືກຕ້ອງ ແລະ ເກີນຄວາມຈຳເປັນລົງ ແລະ ປ້ອງກັນການຕິດ ເຊື້ອຕັ້ງແຕ່ຫົວທີ..

ສະຫຼຸບ, ຢ່າທຳລາຍເຊື້ອຈຸລິນຊີທີ່ດີ ໂດຍການນຳໃຊ້ຢາຕ້ານເຊື້ອຈຸລິນຊີທີ່ເກີນຄວາມຈຳເປັນ ຫຼື ການນຳໃຊ້ຢາຕ້ານເຊື້ອຈຸລິນຊີທີ່ບໍ່ຖືກຕ້ອງ