ການທີ່ເຮົາໃຊ້ຢາຕ້ານເຊື້ອຈຸລິນຊີຢ່າງບໍ່ຖືກຕ້ອງ ຫຼື ໃຊ້ຫຼາຍເກີນໄປສາມາດກໍ່ໃຫ້ເກີດອັນຕະລາຍໄດ້. ການໃຊ້ຢາຕ້ານເຊື້ອຈຸລິນຊີເພື່ອປິ່ນປົວໄຂ້ຫວັດ ຫລືການຊຶມເຊື້ອຈາກເຊື້ອຈຸລະໂລກ, ບໍ່ພຽງແຕ່ຈະບໍ່ຊ່ວຍປິ່ນປົວໃຫ້ດີຂື້ນ ມັນຍັງມີຜົນຂ້າງຄຽງທີ່ອັນຕະລາຍຕາມມາ. ນອກຈາກນີ້, ຕໍ່ໄປຂ້າງໜ້າການກະທຳດັ່ງກ່າວນີ້ ມັນຈະສົ່ງຜົນໃຫ້ຫຍຸ້ງຍາກໃນການທຳລາຍເຊື້ອຈຸລິນຊີ. ໂຕທ່ານເອງ, ຄອບຄົວຂອງທ່ານ ແລະ ຄົນອື່ນໆໃນສັງຄົມອາດຈະຕິດເຊື້ອຈຸລິນຊີ ເລົ່ານີ້ໃນອະນາຄົດ.
ສິ່ງໃດທີ່ບົ່ງບອກວ່າທ່ານກຳລັງໃຊ້ຢາຕ້ານເຊື້ອຈຸລິນຊີຢ່າງບໍ່ຖືກຕ້ອງຢູ່?
[1] ໃຊ້ຢາຕ້ານເຊື້ອຈຸລິນຊີເມື່ອທ່ານເປັນໄຂ້ຫວັດທຳມະດາ ຫລື ໄຂ້ຫວັດໃຫຍ່
[2] ໃຊ້ຢາຕ້ານເຊື້ອຈຸລິນຊີໂດຍທີ່ບໍ່ໄດ້ຮັບຄຳແນະນຳຈາກແພດ ຫຼື ບຸກຄະລາກອນທາງການແພດ
[3] ໃຊ້ຢາຕ້ານເຊື້ອຈຸລິນຊີບໍ່ຄົບຕາມກຳນົດທີ່ລະບຸໄວ້ໃນໃບສັ່ງຢາຂອງແພດ ຫຼື ບຸຄະລາກອນທາງການແພດ
[4] ແບ່ງປັນຢາຕ້ານເຊື້ອຈຸລິນຊີກັບຄົນອື່ນ
[5] ໃຊ້ຢາຕ້ານເຊື້ອຈຸລິນຊີທີ່ເຫຼືອຈາກການປິ່ນປົວເທື່ອກ່ອນ
ທ່ານຄວນເຮັດແນວໃດ?
[1] ບໍ່ຄວນໃຊ້ຢາຕ້ານເຊື້ອຈຸລິນຊີເມື່ອເປັນໄຂ້ຫວັດທຳມະດາ ຫລື ໄຂ້ຫວັດໃຫຍ່
[2] ໃຊ້ຢາຕ້ານເຊື້ອຈຸລິນຊີ ທີ່ໄດ້ຮັບຄຳແນະນຳຈາກແພດ ຫຼື ບຸກຄະລາກອນທາງການແພດ. ເພື່ອຄວາມແນ່ໃຈ, ທ່ານຄວນຖາມ “ມີຄວາມຈໍາເປັນ ຫລືບໍ່ ທີ່ຂ້ອຍຄວນໄດ້ຮັບຢາຕ້ານເຊື້ອຈຸລິນຊີ?”
[3] ໃຊ້ຢາຕ້ານເຊື້ອຈຸລິນຊີໃຫ້ຄົບຕາມກຳນົດທີ່ລະບຸໄວ້ໃນໃບສັ່ງຢາຂອງແພດ ຫຼື ບຸຄະລາກອນທາງການແພດ, ເຖິງແມ່ນວ່າທ່ານຈະຮູ້ສຶກ ດີຂື້ນເເລ້ວກໍ່ຕາມ
[4] ບໍ່ແບ່ງປັນຢາຕ້ານເຊື້ອຈຸລິນຊີຂອງທ່ານກັບຄົນອື່ນ
[5] ບໍ່ໃຊ້ຢາຕ້ານເຊື້ອຈຸລິນຊີທີ່ເຫຼືອຈາກການປິ່ນປົວເທື່ອກ່ອນ
ຄວາມເຂົ້າໃຈຜິດກ່ຽວກັບຢາຕ້ານເຊື້ອທີ່ພົບເຫັນເລື້ອຍໆ
[1] ຕ້ອງການໃຊ້ຢາຕ້ານເຊື້ອຈຸລິນຊີ “ເພື່ອກັນໄວ້ກ່ອນ”
ຄຳຕອບ: ຜິດ. ການເປັນໄຂ້ຫວັດ ຫລືໄຂ້ຫວັດໃຫຍ່ນັ້ນເກີດຈາກເຊື້ອຈຸລະໂລກ, ແລະ ການຖອກທ້ອງກະທັນຫັນສ່ວນໃຫຍ່ ບໍ່ໄດ້ເກີດຈາກການຕິດເຊື້ອຈຸລິນຊີ. ການໃຊ້ຢາຕ້ານເຊື້ອຈຸລິນຊີໂດຍບໍ່ໄດ້ຮັບຄຳແນະນຳຈາກແພດໝໍ ຫຼື ບຸຄະລາກອນທາງການແພດ ເຮັດໃຫ້ທ່ານມີຄວາມສ່ຽງຈາກຜົນຂ້າງຄຽງຂອງຢາ ແລະ ເຮັດໃຫ້ຜູ້ອື່ນມີຄວາມສ່ຽງຕໍ່ການຕິດເຊື້ອຈຸລິນຊີທີ່ຕ້ານຕໍ່ຢາຕ້ານເຊື້ອຈຸລິນຊີໂດຍບໍ່ຈຳເປັນ.
[2] ຂ້ອຍເຄີຍໃຊ້ຢາຕ້ານເຊື້ອຈຸລິນຊີເພື່ອປິ່ນປົວໄຂ້ຫວັດໃນຄັ້ງກ່ອນ ແລະ ຂ້ອຍຮູ້ສຶກດີຂື້ນຢ່າງໄວ, ດັ່ງນັ້ນ ຂ້ອຍຈິ່ງຢາກໃຊ້ຢາຕ້ານເຊື້ອຈຸລິນຊີສຳລັບໄຂ້ຫວັດອີກຄັ້ງ
ຄຳຕອບ: ຜິດ. ໄຂ້ຫວັດທໍາມະດາເກີດຈາກເຊື້ອຈຸລະໂລກ, ເຊິ່ງຄົນສ່ວນໃຫຍ່ຈະມີອາການດີຂື້ນພາຍໃນ 7 ຫາ 10 ມື້. ທ່ານຈະຮູ້ສຶກດີຂື້ນ ເຖິງແມ່ນວ່າທ່ານຈະບໍ່ໄດັໃຊ້ຢາຕ້ານເຊື້ອຈຸລິນຊີ. ຢາຕ້ານເຊື້ອຈຸລິນຊີບໍ່ໄດ້ຊ່ວຍໃນການປິ່ນປົວພະຍາດທີ່ເກີດຈາກການຕິດເຊື້ອຈຸລະໂລກ, ບໍ່ໄດ້ເຮັດໃຫ້ທ່ານຮູ້ສຶກດີຂື້ນ ຫຼື ກັບໄປເຮັດວຽກງານໄດ້ໄວຂື້ນ.
[3] ຂ້ອຍເຄີຍໃຊ້ຢາຕ້ານເຊື້ອຈຸລິນຊີຊະນິດນີ້ ແລະ ມັນກໍ່ບໍ່ມີຜົນຂ້າງຄຽງຫຍັງກັບຂ້ອຍ, ດັ່ງນັ້ນໃນຄັ້ງນີ້ກໍ່ບໍ່ໜ້າຈະມີຜົນຂ້າງຄຽງເຊັ່ນກັນ
ຄຳຕອບ: ຜິດ. ການທີ່ບໍ່ມີຜົນຂ້າງຄຽງຈາກການໃຊ້ຢາຕ້ານເຊື້ອໃນເທື່ອຜ່ານມາບໍ່ໄດ້ໝາຍຄວາມວ່າທ່ານຈະບໍ່ໄດ້ຮັບຜົນຂ້າງຄຽງໃນອະນາຄົດ ການໃຊ້ຢາຕ້ານເຊື້ອທຸກຄັ້ງມັນເພີ່ມຄວາມສ່ຽງທີ່ຈະເກີດຜົນຂ້າງຄຽງໄດ້ເຊັ່ນ: ຖ້ອກທ້ອງ ຫຼື ການຊຶມເຊື້ອຈາກເຊື້ອເຫັດ.
[4] ເຖິງແມ່ນວ່າເຊື້ອຈຸລິນຊີໃນຮ່າງກາຍຂ້ອຍຈະກາຍເປັນເຊື້ອທີ່ຕ້ານຕໍ່ຢາຕ້ານເຊື້ອ ແລະ ຂ້ອຍບໍ່ສະບາຍຈາກເຊື້ອພະຍາດດັ່ງກ່າວ, ຂ້ອຍຍັງ ສາມາດຫາຊື້ຢາຕ້ານເຊື້ອຈຸລິນຊີທີ່ແຮງຂື້ນອີກໄດ້
ຄຳຕອບ: ຜິດ. ເຊື້ອຈຸລິນຊີສາມາດຕ້ານຕໍ່ຢາຕ້ານເຊື້ອຈຸລິນຊີໄດ້ຫຼາຍຊະນິດ. ເຊື້ອຕ້ານຕໍ່ຢາບາງໂຕບໍ່ສາມາດທີ່ຈະປິ່ນປົວດ້ວຍຢາຕ້ານເຊື້ອ ທີ່ມີໃນປະຈຸບັນ. ການນຳໃຊ້ຢາຕ້ານເຊື້ອຈຸລິນຊີໃນທາງທີ່ຜິດສາມາດເພີ່ມໂອກາດໃນການຊຶມເຊື້ອຈາກເຊື້ອຈູລິນຊີທີ່ຕ້ານຕໍ່ຢາຕ້ານເຊື້ອຈຸລິນຊີ ທຸກໆຊະນິດໄດ້
[5] ເຖິງແມ່ນວ່າເຊື້ອຈຸລິນຊີໃນຮ່າງກາຍຂອງຂ້ອຍຈະຕ້ານຕໍ່ຢາຕ້ານເຊື້ອ ມັນກໍ່ເປັນເລື່ອງຂອງຂ້ອຍ, ຂ້ອຍບໍ່ໄດ້ສ້າງຄວາມຫຍຸ້ງຍາກໃຫ້ໃຜ.
ຄຳຕອບ: ຜິດ. ເຊື້ອຕ້ານຕໍ່ຢາຕ້ານເຊື້ອຈຸລິນຊີທີ່ພັດທະນາພາຍໃນຮ່າງກາຍຂອງທ່ານອາດຈະບໍ່ສົ່ງຜົນອັນຕະລາຍຕໍ່ຕົວທ່ານຄົນດຽວ, ແຕ່ມັນສາມາດ ແຜ່ກະຈາຍໃຫ້ແກ່ຄົນໃນຄອບຄົວຂອງທ່ານ, ສິ່ງແວດລ້ອມ ແລະ ຄົນອື່ນໆໃນສັງຄົມໄດ້. ການໃຊ້ຢາຕ້ານເຊື້ອຈຸລິນຊີແບບບໍ່ຖືກຕ້ອງຂອງ ທ່ານສາມາດເປັນອັນຕະລາຍໃຫ້ແກ່ຄົນໃນສັງຄົມລວມທັງຕົວທ່ານເອງໄດ້.