ການຕິດເຊື້ອຈາກເຊື້ອເຫັດທີ່ພົບເຫັນເລື້ອຍໆແມ່ນພະຍາດຕິດເຊື້ອເຫັດຢູ່ຕີນ, ພະຍາດເກື້ອນ ແລະ ການຕິດເຊື້ອເຫັດໃນຊ່ອງຄອດ. ເຊື້ອເຫັດເປັນສິ່ງທີ່ມີຊີວິດດັ້ງເດີມ ເຊື້ອເຫັດອາໄສຢູ່ໃນອາກາດ, ດິນ, ພືດ ແລະ ນ້ຳ. ເຊື້ອເຫັດບາງຊະນິດສາມາດແຜ່ຂະຫຍາຍ ໂດຍການສ້າງເມັດສະ ປໍນ້ອຍໆ ແລະ ກະຈາຍໄປໃນອາກາດ ທ່ານສາມາດຫາຍໃຈເອົາສະປໍເຂົ້າໄປໃນລະບົບຫາຍໃຈ ຫຼື ສະປໍສາມາດຕົກລົງໃສ່ໂຕເຮົາໄດ້.

ທ່ານອາດມີທ່າອຽ່ງທີ່ຈະຕິດເຊື້ອເຫັດຮູບແບບຮຸນໄດ້ ຖ້າທ່ານມີລະບົບພູມຄຸ້ມກັນທີ່ບົກພ່ອງເຊັ່ນ: ການຕິດເຊື້ອ HIV ຫຼື ຜູ້ທີ່ກໍາລັງໃຊ້ຢາຕ້ານເຊື້ອຈຸລິນຊີ. ຢາຕ້ານເຊື້ອຈຸລິນຊີບໍ່ສາມາດຂ້າເຊື້ອເຫັດໄດ້ແຕ່ທຳລາຍເຊື້ອຈຸລິນຊີໄດ້ ໂດຍການຂ້າເຊື້ອຈຸລິນຊີ, ທີ່ເປັນເຊື້ອປະຈຳຖີ່ນຕາມທຳມະຊາດເຊັ່ນຢູ່ໃນຊ່ອງຄອດ ເຊິ່ງພວກມັນປ້ອງກັນເຮົາຈາກການຕິດເຊື້ອທີ່ປົນເປື້ອນມາກັບມື ແລະ ສາມາດກໍ່ໃຫ້ເກີດການຕິດເຊື້ອ.

ການຕິດເຊື້ອເຫັດໃນຊ່ອງຄອດເປັນຜົນຂ້າງຄຽງທີ່ພົບໄດ້ເລື້ອຍໆຈາກການນຳໃຊ້ຢາຕ້ານເຊື້ອຈຸລິນຊີເປັນເວລາດົນ.  ການຕິດເຊື້ອເຫັດໃນຊ່ອງຄອດອາດຈະເກີດຂຶ້ນໃນໄລຍະທີ່ມີການໃຊ້ ຫຼື ຫຼັງການໃຊ້ຢາຕ້ານເຊື້ອຈຸລິນຊີ ເພື່ອໃຊ້ປິ່ນປົວພະຍາດຕ່າງໆເຊັ່ນການອັກເສບຮູຄໍຈາກເຊື້ອ Streptococcus. ດັ່ງນັ້ນພວກເຮົາຄວນໃຊ້ຢາຕ້ານເຊື້ອຈຸລິນຊີໃນຍາມຈຳເປັນ, ນອກຈາກນີ້ພວກເຮົາຄວນຢຸດການນຳໃຊ້ຢາຕ້ານເຊື້ຶອຈຸລິນຊີທີ່ຫຼາຍເກີນຄວາມຈຳເປັນ ຫຼືໃຊ້ບໍ່ຖືກວິທີ [1].

ການຕິດເຊື້ອເຫັດໃນປອດອາດມີອາການຮຸນແຮງ ແລະ ມັກມີອາການຄ້າຍກັບການເຈັບເປັນຂອງພະຍາດອື່ນໆໄດ້ເຊັ່ນ: ໄຂ້ຫວັດໃຫຍ່ ຫຼື ວັນນະໂລກ. ທ່ານໝໍຄວນພິຈາລະນາເຖິງຄວາມເປັນໄປໄດ້ຂອງການຕິດເຊື້ອເຫັດ ເມື່ອຄົນເຈັບມີອາການຂອງພະຍາດປອດອັກເສບ ເຊີ່ງອາການດັ່ງກ່າວບໍ່ດີຂຶ້ນ ເຖິງວ່າຈະມີການນຳໃຊ້ຢາຕ້ານເຊື້ອຈຸລິນຊີໃນການປິ່ນປົວ. ດັ່ງນັ້ນຄວນຈະໄດ້ຮັບການກວດວິເຄາະຫາສາເຫດ ຍ້ອນການຕິດເຊື້ອເຫັດແຕ່ຫົວທີ ເຊິ່ງຊ່ວຍຫຼຸດຜ່ອນການນຳໃຊ້ຢາຕ້ານເຊື້ອຈຸລິນຊີທີ່ບໍ່ຈຳເປັນ ແລະ ຊ່ວຍໃຫ້ຄົນເຈັບໄດ້ຮັບຢາຕ້ານເຊື້ອເຫັດໄດ້ຢ່າງທັນທ່ວງທີ, ຖ້າມີຄວາມຈຳເປັນ.

Reference: 

1 CDC (2017). “Fungal Infections- 10 Questions to protect your health.” Cdc.gov